( ماعنتش باصدق ) زجل للدكتور / صبرىإسماعيل

ماعنتش باصدق

*****
ماعنتش باصدّق كلام الصحايف
ولا اللى بلؤمه بيعمل رجايف
ولا اللّى بعيونه لَكنّه ما شايف
ولا اللى حياته واخدها هبل
ماعنتش باصدّق كلام الدجل
*******
ماعنتش باصدّق عدوّ الحياة
وواخد سفينته لحد المتاه
وشادد جهالته وخُبثه وراه
وسايق علينا فنون الهطل
ماعنتش باصدّق كلام الدجل
******
لاعمرى رميت البياض ع الودع
ولا عقلى بعته فى سوق البدع
ومهما صرخنا ولا بيرتدع
ومهما دفعنا طموحنا نزل
ماعنتش باصدّق كلام الدجل

د صبرىإسماعيل