( أحلـــي كــــلام ) ـ بقلم الشاعر / محمد عسل

( أحلـــي كــــلام )

شايف عينك تحت الحاجب بتبصبصلي...
ممكن تيجي عشان نتفاهم أو نتعامل؟!
أو نتناقش يمكن تدخل حصه ف فصلي..
ع السبوره يكتب ليك القلب رسايل..
ممكن تلقي الحب معايا جميل م الأصلي...
أهو نتحاور يمكن برضه نسوي هوايل...
وأقطُف ورد شفايفك أدوقه وتفصصلي...
يمكن طعمها يمحي المُر ويطلع هايل...
بُص هاقولك أحلي كلام وبشوق تسمعني...
لازم تعرف إني مقدم أحلي جمايل..
مين بيعاكسك ويبصبصلك مين بيغني؟!
مين بيحاصرك وسط الحاره عشان يتحايل؟!
مين لو تضحك مره شفايفك يجي يهني؟!
مين بيشُق طريق ف الهوا لو يوم تتمايل؟!
مين لو غابت مره عنيك بيكون مستني؟!
مين لو تزعل يجي جايبلك فرح وشايل؟!
أيوا بحبك حب يخلي جبال تتكلم...
أيوا حجاره تلين من حبك أه تتمايل..
إيه المانع تبقي جبال لكن تتألم؟!
لو هاتغيب أو يبقي الحزن لقلبك طايل؟!
بُص هاقولك طيب حاجه وبعدها روح...
تيجي نحب الحب ونعمل أحلي عمايل؟!
تيجي أبنيلك عِش يشيلك جوه الروح؟!
وأبقي صاببلك شهد ف روحك ينزل سايل!
لو هاتفكر بعد ماتمشي ياقلبي تروح...
فكر برضه ف حظي العايش دايماً مايل...
فكر إن سنيني قضيتها بعيد مجروح..
فكر يلا بجد حبيبي وحاول حاول.

بقلم / محمد عسل