(سيل)بقلم .. محمد عسل

(سيل)
إلحَق إلحَق سِيل ورا سِيل..
نازلين خَبط ف سَطح الدار..
بيتي ضَعيف مهدود الحيل..
بيتي مهوش قد التيار..
هاعمل إيه الحِمل تقيل..
سيل بحقيقي ماهيش أمطار..
أحمي إزاي بيتي المهدود؟!
أعمل نَفسي ف بيتي جدار؟!
حتي الرعد!!
قاعد يزْعَق بالأخطار..
حتي البرق!!
قاعد يخطف ف الأنظار..
والشباك من خوفه خلاص...
كل إزازُه إنهد وطار..
حتي كمان من خوف الناس..
قايمين يدعوا ليل ونهار..
حتي الشارع..
فيه المايَّه بالأمتار..
وقفِت كل خطوط السير..
صَبَحِت نقطه ف وسط بحار..
سألوا الناس مين المحقوق..
قالوا كتير..
سوء تخطيط مع سوق أعذار..
ذنب الناس كان هم كبير..
لازم ينضَف بالأمطار..
سيل ورا سيل..
نازل نازل كالأنهار..
حتي البيت بالطوب الني..
أصبح طينَه شاربه مرار..
سألوا الناس...
قالوا هاييجي رئيس الحي..
راكب مركب ..
هايصبرنا بألف شعار..

بقلم .. محمد عسل