( كايْن ْاعْلاشْ ) ـ الفنانة والزجالة فاطمة بصور

*** كايْن ْاعْلاشْ ***

كايْنْ... بَصَّحْٰ ...كايْن...
كاين اعْلاش....
وراه كاين اعلاش...
كاين اعلاش اتٓصَفّر ْالرِّيحْ
فَوْدَنْ التّاريخ...
ملٍي باطَلْ لِيًام ْ
على زْمانّا ايْطِيحْ ؟!
كاين...بَصَّحْ كايْنْ
كاين اعلاش...
كاين اعلاش شَمْسْ الْوَقْتْ
تَلْبَسْ اللِّٓيل قفْطانْ...
مَلّي فْجَرْنا...يَتعَكّلْ فَْجْلايْلْ الظْلام ْ...
ظْلامْ حٌگرَة ْهاد لِيّام...
كاين...بصح كاين
كاين انت...
كاينة آنا...
گاينين احنا.
الِّي انقّشْنا وْجَهٔ لِيّام
بْدَلْ داك الصْبَر الي كيْدبَرْ
وْقَصّرْنا لَعْنايَة لْداك لَعْمَرْ
واييِّيهْ كايْنْ...
كاين اعلاش..
اعلاش احْنا كايْنِينْ ...
والنَّفْسْ فينا اتْوَدْراتْ؟!
حَييِّنْ...وْتيلادْ الْعَزّ
فْدِيكْ النَّفْسْ ماتْ؟!

كاينة مجنونة الحرف والركح:

الفنانة والزجالة فاطمة بصور ...

فْعَيْنْ الْوَقْت.ْ